حبل الغسيل

although keeping my distance ... i couldn't but write about this ... the first from " تعى لنفرض" series

"اذا جينا لنفرض مثلاً ، فرضاً يعني ، والفرضيّة ما بتجبرك بشي ، ما عم بفرض وفيك ترفض بس خدني عقد عقلي و تعى افترض" انّو كنت واقف حدّي بنهار أحد، شاءت "الصدف" أنو يكون نهار انتخابات مجالس بلديّة و اخت-ياريّة بموقع جغرافي معيّن ، شاء "القدر" انو يكون مذكور ع اخ-راج أي-دي أنو هيدي مس- قط رأسي، مع اني زايرها مرّتين بحياتي، عم تسمع و تشهد على وسع فكر و تحضّر مرشحين تنين شايبين عمنصب فخ- امة المختار ، كمان شاءت "الظروف" انو يكونوا بيّاتن أخوة مش بس من ذات "الجبّ" ...خدلك مللا شغله

بنص دين ساحة الضيعة واقفين كل واحد بقاطع و ما ضل حدا قاطع ما أغنى فهرس مفرداتو بتعابيرن المبتكرة، ايه المبتكرة ، و هون بدّي اخد لحظة لهنّي خيالن الواسع و سرعة بديهيّتن، يمكن وراثيّة بس عندن قدرة غريبة أنو يصُفو احرف يصَفو كلمات اذا صفيتن بذات الترتيب يللي ما في شي من الترتيب بتخلق يا خلوق الفاظ أستحوا يقولوها جمهور الحكمة و الرياضي لبعض بعزّ عطائن الفكري .

خليك عم تفرض معي للآخر انّك كنت موجود بهالمناظرة لانك كنت اكتشفت أنّو الاول نازل بوج التاني لأنّو أبو التاني، الله يرحمو و يرحم موتاك، ما كان يحكي مع أبو الاوّل ، كمان يرحمو و تاخد عمرو، علما انّو رضعانين من ذات ... القنينة ، لانّو بيوم مشمس من أيّار من اربعين أيّار لوَرا كمان شاء " الحظ" أنو يكون نهار أحد ...( تشّ شعر بدني ولو ) قام أبو التاني قص حبل غسيل أبو الاول لانّو عم بينقط لعندو، مجنون تهوّر و عملها، خرق معاهدة جنيف و قص حبل جنفياف فوقعت الكارثة و ركب التماس و صار في تحوّل جيني فوري حمل رواسب هالمجزرة ... و بليلتها و تيلهوون نسوانن تما تطّور المسائل ، لعبو بيت بيوت و شرّفوا المخاتير بالملفوفي يللي بعد اربعين أيّار عم ينشروا غسيلن الوسخ قدام شعوب المنطقة بس مش عالحبل لانّو مقطوش .

يعني بدي عذبك تضلّك عم تفرض معي انك معي و اذا ما فيا تقله تمشي معي عالحي الفوقاني، فشخه ولو ، هون حد الصنوبرة، في هالبيت السقفو احمر ، مش بيت يوسف ، يللي بوجّو دغري ...ايه هيدا، بيت أهل الديكين اللي بالساحة... في حبل غسيل قديم مدندل من فوق، بدّي منّك ترفعني و تهدّيني فوق لأربطو عرقبتي و ساعاتها أنا بتذكّر أنّك فرضّية و ما في حدا مهدّيني ...و تعيش انت